ამერიკიდან ჩამოყვანილი მანქანა: რა შევამოწმოთ ყიდვამდე და ყიდვის შემდეგ
განახლდა: · PRO SERVICE
ამერიკიდან ჩამოყვანილ მანქანას ორჯერ ვამოწმებთ. ყიდვამდე ლოტს ვსწავლობთ: ტაიტლის ტიპი, დაზიანება, Copart-ის ან IAAI-ის ფოტოები, გარბენი. როცა მანქანა ბათუმში ჩამოვა, ვუყურებთ, რა ხარისხით აღადგინეს, და ვაკეთებთ პირველ სერვისს: მანქანამ თვეები გაატარა აუქციონის მოედანზე, კონტეინერში და პორტში, ამიტომ მის ყველა სითხეს ეჭვით ვუყურებთ.
ტაიტლი: რას ამბობს საბუთი
ტაიტლი ამერიკაში საკუთრების საბუთია და მისი ტიპი მაშინვე გეუბნებათ, რა გადაიტანა მანქანამ.
- Clean. სადაზღვევომ ის არ ჩამოწერა. ავარია მაინც შესაძლებელია, პატარა ზარალს ჩამოწერის გარეშე იხდიან.
- Salvage. სადაზღვევომ ჩათვალა, რომ შეკეთება არ ღირს. საქართველოში ჩამოსული აუქციონის მანქანების უმეტესობა ასეთია.
- Rebuilt ან Reconstructed. შეაკეთეს ამერიკაში და შტატის შემოწმება გაიარა.
- Flood ან Water damage. წყლის ნიშანი, ზოგ შტატში ცალკე ხაზად იწერება.
- Junk, Parts only, Certificate of Destruction. ამერიკის გზებზე ეს მანქანა აღარ ივლის, ნაწილებად იყიდება.
Salvage თავისთავად განაჩენი არ არის. ტაიტლის ტიპი ფასს და შემოწმების სიღრმეს განსაზღვრავს.
ლოტის გვერდი და VIN ისტორია
- Primary და Secondary damage. ძირითადი და მეორეხარისხოვანი დაზიანება. Front end და Water/Flood სულ სხვა მანქანებია, თუნდაც ფოტოზე ორივე სუფთა ჩანდეს.
- Odometer: Actual, Not Actual, Exempt. Not Actual ნიშნავს, რომ დაფის ციფრს არაფერი ადასტურებს.
- Run and Drive, Engine Starts. მანქანა დაიქოქა და მოედანზე გადაადგილდა, ან მხოლოდ დაიქოქა. ძრავის მდგომარეობაზე ეს თითქმის არაფერს ამბობს.
- Keys. გასაღები თუ არ ახლავს, ბევრ მოდელზე ახლის ჩაწერა მოგიწევთ.
ლოტის ფოტოები ყიდვის დღესვე შეინახეთ. მერე ძნელი საპოვნელია, შემოწმებისას კი აჩვენებს, რა შეცვალეს და რა გაასწორეს. Carfax და AutoCheck აჩვენებს რეგისტრაციებს, გარბენს და ავარიებს. თუ რეპორტში გარბენი დაფაზე მეტია, გარბენი დაგრეხილია. ტეხასიდან ან ფლორიდიდან ქარიშხლიდან ორ კვირაში აუქციონზე გამოსულ მანქანას წყალზე ცალკე ვამოწმებთ. სალონში წყლის კვალს როგორ ვეძებთ, წერია სტატიაში დატბორილი მანქანა.
რას ვამოწმებთ შეკეთებულ მანქანაზე
ზოგად სიას აქ არ გავიმეორებთ, ის არის სტატიაში რას ამოწმებენ მანქანის ყიდვამდე. აუქციონის მანქანებს თავისი სუსტი ადგილები აქვს:
- აირბეგები და ღვედების პრეტენზიონერები. გახსნილ მოდულებს ზოგჯერ რეზისტორით ცვლიან, რომ ნათურა ჩაქრეს. როგორ ვპოულობთ: SRS სისტემის შეკეთება.
- ძარის გეომეტრია. ძლიერი დარტყმა ფოტოზე ნიშნავს გეომეტრიის შემოწმებას. მანქანა შეიძლება სწორად მიდიოდეს და ლონჟერონი მაინც მოღუნული იყოს.
- იაფი ნაწილები. არაორიგინალი რადიატორი, კონდიციონერის კონდენსატორი, ფარები კორექტორის გარეშე, პარკინგის დატჩიკები (სენსორები). მუშაობს, მაგრამ ნაკლებს ძლებს, კონდენსატორი კი პირველი იწყებს ფრეონის გაშვებას.
- ხადავოი დარტყმის შემდეგ. მოღუნული ბერკეტი ან მუშტი მანქანას გვერდზე ექაჩება და საბურავებს არათანაბრად ცვეთს. რაზვალი ამას ვერ შველის.
- გარბენი ბლოკებში. ABS-ის და ძრავის ბლოკები საკუთარ გარბენს ინახავს, სკანერი შეუსაბამობას აჩვენებს.
მილები და ამერიკული კომპლექტაცია
ამერიკული მანქანის დაფა მილებს აჩვენებს. ხშირად მას კილომეტრებზე გადააწყობენ და გარბენს როგორც მოუვათ, ისე გადაითვლიან. საბუთებში ერთი ციფრია, დაფაზე მეორე, წელიწადში კი აუქციონის ციფრი აღარავის ახსოვს. ამიტომ ლოტის ამონაბეჭდი საბუთებთან ერთად შეინახეთ. სხვა განსხვავებები: ნარინჯისფერი გვერდითი ნათურები, ფარების ამერიკული სტანდარტი. მათი გადაკეთება საჭირო არ არის, უბრალოდ იცოდეთ, საიდანაა მანქანა.
პირველი სერვისი ჩამოსვლის შემდეგ
ჯერ აუქციონის მოედანი, მერე ერთი-ორი თვე კონტეინერში ფოთამდე, მერე განბაჟება. სითხეები ბერდებოდა, საბურავები ერთ ადგილზე იდგა, ჰაერის ფილტრის კორპუსში ზოგჯერ მღრღნელის ბუდესაც ვპოულობთ. პირველ ვიზიტზე:
- ზეთის შეცვლა ფილტრით, ჰაერის და სალონის ფილტრები;
- სამუხრუჭე სითხე: ასაკი უცნობია, ამიტომ იცვლება;
- ანტიფრიზი: ყინვაგამძლეობა და ფერი, ეჭვის შემთხვევაში იცვლება;
- კარობკის ან ვარიატორის ზეთი: მდგომარეობით და გარბენით;
- აკუმულატორი: ხანგრძლივი დგომა ხშირად ნულამდე ცლის და მერე დამუხტვას ცუდად იჭერს;
- საბურავები: გამოშვების თარიღი, თიაქრები, დგომით დეფორმაცია;
- კონდიციონერი: გაჟონვის შემოწმება, განსაკუთრებით წინა დარტყმის შემდეგ.
ყიდვამდე და ყიდვის შემდეგ
ყიდვამდე გამოგვიგზავნეთ ლოტის ბმული და ფოტოები, ყიდვის წინ შემოწმებისას მანქანას მათ შევადარებთ. შემოწმების ფასი 89 ₾-დან. ყიდვის შემდეგ ჩაეწერეთ ტექმომსახურებაზე ყველა ბლოკის სკანირებით. სკანირება 30 ₾-დან.
ხშირად დასმული კითხვები
Salvage მანქანის ყიდვა შეიძლება?
შეიძლება, თუ ისტორია გასაგებია და შეკეთება სწორადაა გაკეთებული. პრობლემა ტაიტლის სიტყვა კი არა, შეკეთებაა, რომელსაც ვერავინ ამოწმებს.
მანქანა უკვე შეკეთებულია. ლოტის ფოტო რად მინდა?
ახალი საღებავი არაფერს გეტყვით. ფოტოზე ჩანს, რა იყო დამტვრეული, და სწორედ იმ კვანძებს ვამოწმებთ მიზანმიმართულად.
შეკეთების შემდეგ აირბეგის ნათურა ანთია. რატომ?
ჩვეულებრივ მოდული ან პრეტენზიონერი არ შეცვალეს, ან SRS ბლოკში ავარიის მონაცემები დარჩა. გახსნის შემდეგ ბლოკი იწმინდება ან იცვლება.
გემზე მყოფი მანქანის შემოწმება შეიძლება?
VIN-ის, რეპორტის და ფოტოების, კი. ტექნიკური მდგომარეობის, მხოლოდ ჩამოსვლის შემდეგ.
● 06 · კონტაქტი
დაგვიტოვეთ განაცხადი — გადმოგირეკავთ და დათვალიერებაზე ჩაგწერთ
მოგვწერეთ, რა დაემართა მანქანას. გადმოგირეკავთ, კითხვებზე გიპასუხებთ და დროს შევარჩევთ. ზუსტ ფასს დათვალიერების შემდეგ გეუბნებით: ფოტოზე დაზიანება ყოველთვის არ ჩანს.
განაცხადის გაგზავნით ეთანხმებით კონფიდენციალურობის პოლიტიკას.
ან მოგვწერეთ მესენჯერში — იქვე გიპასუხებთ:
- მისამართი
- აეროპორტის გზატკეცილი 212მ, ბათუმი
- ტელეფონი / WhatsApp / Telegram
- +995 599 66 66 75 · WhatsApp · Telegram
- მარშრუტი
- Google Maps ↗Yandex ↗Waze ↗
